Хонины махтай, сонгино, сармистай гурилтай шөлөөр яс, мах булчин, үе, холбоосууд төлжинө. Сүүтэй цайгаар хийг тэгшитгэж, биеийн тамир тэр дундаа арьс төлжиж сайхан зөөлрөнө. Зарим нэгэн: “Сүүтэй цай уухаар гэдэс дүүрээд байдаг” гэнэ.
Хургасан хийг хөдөлгөж, хөөж байгаа нь тэр юм аа. Ус, өвсөөр хооллоод галын илч, шимээ алдаж, хавагнаж, ядарч сульдаж болохгүй ээ. Гурилтай шөл, сүүтэй цайгаа өдөр бүр хэмжээг нь тохируулж хэрэглэж байгаарай.
3 шимт, 4 шимт, 5 шимт ясны шөлөнд ямар ямар яс байдаг вэ? Саяхан энэ асуултыг асууж байгаа харагдсан.
• 3 шимт яс: Борви + Тойг+ Далны толгой
• 4 шимт яс: 3 шимт + Годон
• 5 шимт яс : 4 шимт + Дунд чөмөг
Ийм ялгаатай байдаг. Хаврын улиралд алийг нь ч хэрэглэсэн ХИЙ тэгшитгэх тустай. Хийн өвчний бүлэгт ШӨЛӨН эмийн бүлэг гэж байдаг. Шөлөн эмд 3,4,5 шимт ясны шөл багтдаг. Хаврын улиралд цагаан гаа, жамц давс нэмж хэрэглэвэл тустай.
Өвөг дээдэс минь “авах, гээхийн ухаантай явж ирсэн” ард түмэн билээ. Юуг авах, юуг авахгүй байх, юугаа хаях, юугаа хаяхгүй байхаа мэддэг байхыг авах гээхийн ухаан гэнэ. Аливаад авах гээхийн ухаанаар хандаж уншаарай. Танд талархлаа.
Эх сурвалж: Алтан урагт захихуй Биеэ засахуйн эрдэм ёсон сургаалаас
