Итгэл үгүй бол зүрх мохно
Идэвхи үгүй бол аз ухарна
Итгэлцэл үгүй бол хайр халирна
Ир зориг үгүй бол амжилт алсарна
Урам үгүй бол сэтгэл унтарна
Уясал үгүй бол уушиг багтарна
Ухаарал үгүй бол сүүдэр отно
Уучлал үгүй бол сүнс доройтно
Эрдэм үгүй бол тархи хоосорно
Эмээлт үгүй бол жудаг хөөсөрнө
Энэрэл үгүй бол энэлэл гэтнэ
Эрмэлзэл үгүй бол мөрөөдөл гутна
Өчил үгүй бол өвгөд будилна
Өршөөл үгүй бол эмгэд буруулна
Өглөг үгүй бол буян барагдана
Өв үгүй бол үндэстэн мартагдана
Зорилго үгүй бол амьдрал бүүдийнэ
Зовлон үгүй бол жаргал бүдгэрнэ
Зүүд үгүй бол зөн бүдэрнэ
Зүтгэл үгүй бол заяа зүдэрнэ
Хайр үгүй бол хорвоо хөрнө
Хань үгүй бол орчлон сэрүүснэ
Халамж үгүй бол янаг хадуурна
Хатуужил үгүй бол ялалт тохуурхана
Үнэн үгүй бол жам сөхөрнө
Үзэл үгүй бол бодол сохорно
Үлгэр үгүй бол үрс мухардана
Үрс үгүй бол үндэстэн үгүйрнэ
Эцэг үгүй бол тэнгэр нурна
Эжий үгүй бол газар хөмөрнө
Эв үгүй бол эх орон бутарна
Эх орон үгүй бол эрэл зогсоно!
Өвөг дээдэс минь “авах, гээхийн ухаантай явж ирсэн” ард түмэн билээ. Юуг авах, юуг авахгүй байх, юугаа хаях, юугаа хаяхгүй байхаа мэддэг байхыг авах гээхийн ухаан гэнэ. Аливаад авах гээхийн ухаанаар хандаж уншаарай. Танд талархлаа.
Эх сурвалж: Б. Эрдэнэтуяа “Игэл үгүй бол”
