Биеийг шимжүүлэн, төлжүүлж, хий тэгшитгэж, дархлаа сайжруулах хийцтэй цайг хэрхэн хийж уух вэ?

Өглөөний хоолыг өөртөө зориул хэмээн өвөг дээдэс минь айлдсан байдаг. Та өглөөний цайндаа юу хүртдэг вэ? Өглөөний цайнд бор гурил хамгийн ач тустай.
Өглөөний цайнд:

• Идээний дээд хуучин арвайн гурилыг хоолны халбагаар 3,
• Тосны хаан шар тосыг хоолны халбагаар тэгш дүүрэн 1, Галын илчийг тэтгэгч зөгийн балыг хоолны халбагаар тэгш дүүрэн 1 хийгээд,
• Эмийн эх буцалгасан халуун усаар зуурч иднэ.

Энэ нь биеийг шимжүүлэн төлжүүлж, бодисын солилцоог сайжруулж, өтгөн хаталтаас сэргийлэх зэрэг тус эрдэмтэй.

Биеийг шимжүүлэн, төлжүүлж, хий тэгшитгэж, дархлаа сайжруулах хийцтэй цай.

• Хонины ясыг усанд 2 цаг орчим чанаж буцалгана.
• Цайны идээгээ хийж, 15 мин орчим сайтар идээштэл нь буцалгана.
• Хонины сүүлний өөх жижиглэн хэрчиж хуураад дээрээс нь арвайн гурил, цагаан будаа хийж хуурна.
• Цайны хужир бага зэрэг хийнэ.
• Жамц давс бага зэрэг хийнэ.
• Чанаж бэлтгэсэн ясны шөл бүхий хар цайгаа хийгээд будаа болтол нь буцалгана.
• Будаа болмогц сүү хийж буцалгана.
• Сүүтэй цай буцалмагц хонины махаар хийсэн баншаа хийж, болтол нь буцалгана.
• Хийцтэй цай бэлэн болоход бурхан шүтээндээ дээжээ өргөөд, өрхийн тэргүүнээс эхлэн дараалан аягалаж хүртээрэй.

Эх сурвалж: Манба Дацан Нэгдсэн эмнэлгийн Зөвлөх эмч, АУ-ы доктор, профессор Г.Одонцэцэг эмчийн зөвлөгөө