Илүү новшгүй гэр саруул. Элдэв бодолгүй оюун цэлмэг. Хур хоггүй хороо цэмцгэр. Хурших санаагүй сэтгэл тунгалаг. Нөхрийн мууг харахаар Өөрийн мууг хар. Эдийн хэврэгийг гайхахаар Эзний гамыг мэд.
Зажлахгүй залгих ходоодонд цөвтэй. Тунгаахгүй ярих үйлэнд цөвтэй. Зайдан унаа бөгс холгоно. Завхуул явдал заяа холгоно. Ууланд яваа бугыг хараад Унасан хүлгээ голоод юүхэв. Учрал ерөөлгүй алсыг саравчлаад Унаган заяагаа нулимаад юүхэв.
Гялгар бүхэн алт биш. Гэлэн бүхэн багш биш. Цэгээн чулуу чандмань биш. Засдаг дүртэн хутагт биш. Зол ирэхэд бүү гэдий. Зовол ирэхэд бүү бөхий. Зориггүй хүнд зам хол. Сүсэггүй хүнд бурхан хол. Эдийн чанарыг эдэлж таньдаг.
Эрдмийн ихийг сурч мэддэг.
Билигтэй хүн чөтгөр зарцална. Аргатай хүн арслан унана. Бие нь шударга байвал Сүүдэр муруйгүй. Сэтгэл тогтуун бол явдал тогтуун. Санаа тунгалаг бол заяа тунгалаг. Бага эрдэмт магтаалд баясдаг. Бахдам эрдэмт бүтээлд баясдаг.
Сайрхуу хүн хол явахгүй. Сайрын ус нуурт хүрэхгүй. Өнгөнд шунаад өнийн жаргалгүй. Мөнгөнд шунаад мөнхийн хутаггүй.
Хилэнц хорхойн сүүл нь хортой. Хилэнцэт сэтгэлийн уг нь хортой. Нүүрийн буртгийг толинд харж мэднэ. Нүглийн буртгийг номд учирч ухаарна. Тэнэг хүнд тэнгис өвдгөөр татам. Тэрсүүд мунхагт ном амаар татам. Нэг цагийн эндүүрлээс болж Нэгэн насны гэмшил болох. Нэг мөчийн сэхээрлээс үүдэж Мянган бурханы үүд нээгдэх.
Эх сурвалж: Өвгөдийн сургаал
